ആത്മാക്കളുടെ താരാട്ട്

 ആത്മാക്കളുടെ   താരാട്ട്.
=====================

ഈ രാവിലലസമായ് ഇരുളിനെ നോക്കി
ഈറന്‍ നിലാവിന്റെ കണ്ണിണ മൂടി
ഈ പടിവാതില്ക്കല്‍ ഞാനിരിക്കേ,
ഈണം മറന്നൊരാ രാപ്പാട്ടു കേള്‍ക്കുന്നു.

ആര്‍ദ്രമായമൃതുപോലൊഴുകിയെത്തുന്നൊരാ
രാപ്പാടി തന്‍ നേര്‍ത്ത മധുരഗീതം
ആനന്ദമേകുമാ താരാട്ടു കേട്ടെന്റെ
ഏകാന്തചിത്തം വിതുമ്പിടുന്നു

അനുസ്യൂതമകലെ നിന്നെത്തുമീ മൃദുനാദ-
നിര്‍ഝരി മധുമാരിയായ് പൊഴിഞ്ഞു
കൂരിരുട്ടിന്റെയപാരതയ്ക്കുള്ളിലായ്
ചെറുസ്നേഹനാളമൊന്നതിലെരിഞ്ഞു

ആകാശമധ്യേ ചിരിച്ചു നില്‍ക്കുന്നുണ്ട-
ങ്ങെന്നെയും നോക്കിയാ താരദ്വയങ്ങള്‍
പാടുന്നുവോ സ്നേഹവാത്സല്യമൊക്കെയും
ചാലിച്ചെടുത്തോരു  താരാട്ടിന്‍ ശീലുകൾ

നെറ്റിമേല്‍ വീണുകിടക്കും കുറുനിര
മെല്ലെയൊതുക്കി,ത്തഴുകിയെന്‍ മുടിയിഴ,
മെല്ലെപ്പുറത്തങ്ങു താളം പിടിച്ചുവോ,
നെറ്റിയില്‍ പൊന്നുമ്മ ചന്ദനം ചാര്‍ത്തിയോ

ഒക്കെയും സ്വപ്നമാണെന്നറിഞ്ഞീടിലും
ഒരുവേള ആശതന്‍ പൂന്തോണിയേറി
പ്രിയരവര്‍ വാഴുമാ പൂങ്കാവനത്തില്‍
ചെന്നണഞ്ഞീടുവാന്‍ മോഹമേറെ....