നീയൊരു പുഴയായ്...ഞാനൊരു കണമായ്..

ഒഴുകുവതെന്നും

നീയൊരു പുഴയായ്..

അതിലൊരു ചെറുമണി

നീര്‍ക്കണമായ് ഞാന്‍....

ആഴമളക്കാന്‍ കഴിയാതുള്ളൊരു

സ്നേഹക്കടലായ് മേവും നിന്നുടെ

ഹൃദയത്തിരകളില്‍

ഒരു തിരയായ് ഞാന്‍

പൊങ്ങിത്താണു

തുടിക്കട്ടെ....

ഒഴുകും നിന്നുടെ

ഓര്‍മ്മസരിത്തില്‍ ,

ഒരുചെറുകാറ്റില്‍

ഇളകും വെയിലിന്‍

ചില്ലകള്‍ തീര്‍ക്കും ജ്യോതിര്‍ജ്ജാലം

ഹൃദയച്ചെപ്പിലിറുക്കിയടയ്ക്കാം

സ്വപ്നങ്ങള്‍ തന്‍

നാടയില്‍ ബന്ധി-

ച്ചിരുളിന്‍ കാവലില്‍

ഇത്തിരി നേരം

ഒഴുകിവരും നിന്‍

പ്രണയക്കാറ്റില്‍

അലയും ഞാനാം

ജലദം ചെറുമഴ

നീര്‍ക്കണമായ് നിന്‍ ഹൃദയച്ചൂടില്‍

സ്നേഹത്തണുവായ് വന്നുപതിക്കാം

മുക്തകമാകാം

വെണ്മയുതിര്‍ക്കാം

അലിയാം നിന്നിലെ

ആര്‍ദ്രതയില്‍.....