വിശ്വാസം !

പൂങ്കുയിലേ,
എന്റെ സ്നേഹമാധുര്യം 
നാവില്‍ പുരട്ടാതെ 
 എങ്ങനെ നിന്റെ ഗാനം പൂര്‍ണ്ണമാകും!
പൂങ്കാറ്റേ,
എന്റെ സ്നേഹസുഗന്ധം 
കവര്‍ന്നെടുക്കാതെ 
നിനക്കെങ്ങനെ വീശിമറയാനാകും!
മാരിവില്ലേ, 
എന്റെ സ്നേഹവര്‍ണ്ണങ്ങള്‍
ചാലിച്ചു ചേര്‍ക്കാതെ 
നീയെങ്ങനെ മാനത്തുദിക്കും!
വിശ്വാസം 
മഴയില്‍ കുതിരാത്ത
വെണ്‍മുത്തായിരിക്കേ,
നമുക്കു നടക്കാം , ഈ കടല്‍ക്കരയില്‍ 
വെയില്‍ ചായുവോളം 
കാലില്‍ മുത്തമിടുന്ന തിരകളെയെണ്ണി..
നിന്റെ കൈവിരല്‍ കോര്‍ത്തുപിടിക്കാതെ 
തിരകളെണ്ണാന്‍ എനിക്കാവില്ലെന്ന്
നിനക്കു മാത്രമല്ലേ അറിയൂ...